தம்பி ராமையா அதிசயங்கள்

       " தம்பி ராமையா " - நீண்ட போராட்டத்திற்கு பிறகு நல்லதொரு அங்கிகாரம் பெற்ற கலைஞன். மைனா படத்திற்காக சிறந்த குணசித்திர நடிகர் என்னும் தேசிய விருது பெற்றவர். நம்ம ஊர்க்காரர்.

தம்பி ராமையா

 இவரின் சொந்த ஊர் திருமயம் அருகே உள்ள ரா.ரா.புரம். இவரின் துணைவியாரின் பெயர் பொன்னழகு. இவருக்கு கவிதா,விவேகா என்ற இருகுழந்தைகள். கண்ணதாசன் மேல் கொண்ட காதலால் ஹோட்டலில் பார்த்து கொண்டிருந்த மேலாளர் பதவியையும் விட்டுவிட்டு சினிமா மேல் காதல் கொண்டு பாடல், இசை என்னும் இரு துறைகளை தேர்ந்தெடுத்து தன் பயணத்தை தொடர்ந்தார். 

சினிமா மேல் கொண்ட ஆர்வ மிகுதியால் தேர்ந்தேடுந்த துறைகளையும் மீறி
நடிகர் , இயக்குனர் என்ற அவதாரம் எடுத்தார்.  'மலபார் போலீஸ்'  என்னும் படம் முலம் தன்னுடைய பயணத்தை தொடர்ந்த இவர் ,  'மனுநீதி ' என்னும்
படத்தின் மூலம் இயக்குனர் என்ற அந்தஸ்தையும் பெற்றார்.

அதன் பிறகு 30 படங்களுக்கு மேல் பணியாற்றி வந்தாலும் 2010 அவருக்கு ஒரு
திருப்பு முனையாகவே இருந்தது. பிரபு சாலமன் இயக்கத்தில் , இது ஒரு உண்மயான திராவிடர்கள் படம் என சூப்பர் ஸ்டாரால் பாரட்டப்பட்ட "மைனா"
படத்தின் மூலம் இந்திய சினிமாவால் சிறந்த குண சித்திர நடிகர் என தேசிய
விருது என்னும் கிரிடம் கொண்டு அலங்கரிக்கபட்டார்.


தன்னுடைய எளிமையான பேச்சால் அனைவரையும் கவரும் தம்பி ராமையா அவர்கள் விஜய் அவார்ட்ஸ் நிகழ்ச்சியில் கலந்து கொண்டு மைனா படத்துக்கான குண சித்திர நடிகருக்கான விருதுடன் பேசியது சிலிர்க்க வைத்தது.  "தமிழகத்தின் மிகவும் பிற்படுத்தப்பட்ட மாவட்டமான புதுக்கோட்டை மாவட்டத்தில் இருந்து வந்த 45 வயதை தாண்டிய கலைஞனுக்கு வெற்றி என்பது ஒரு பொருட்டு அல்ல." என்ற வார்த்தையை உதித்த பண்பட்ட மனிதர்.

மேலும் தற்பொழுது வெளியாகி வெற்றிகரமாக ஓடிகொண்டிருக்கும் 'கழுகு'
படத்தில் சித்து என்ற வேடத்தில் சிறப்பாக நடித்து ஊர் உலகத்தையே கலக்கி
கொண்டிருக்கிறார் மனிதர்.

கூடுதல் செய்தியாக , தம்பி ராமையா அவர்கள் "தாய்மடி" என்ற அறகட்டளை தொடங்கி ஏழை மக்களுக்கு உதவ போவதாக அறிந்தேன்.  அய்யாவின் முயற்சி வெற்றி அடைய வாழ்த்துக்கள்.

அடுத்த அதிசயத்தில் சந்திப்போம்...  

நீயா - நானா கோபிநாத் அதிசயங்கள்

நீயா - நானா கோபிநாத்-க்கும் புதுக்கோட்டைக்கும் என்ன சம்பந்தம் இருக்குன்னு கேட்கிற ஆளா நீங்க?? - அவரும் நம்ம  ஊருக்காரருதானுங்கோ!

கோபிநாத்

 நீயா நானா கோபிநாத் என்று ஊர் உலகமே அறியப்பட்ட கோபிநாத்
 புதுக்கோட்டை மாவட்டம் அறந்தாங்கியில் சந்திரன் - குமுதம் சந்திரன்
 தம்பதியினருக்கு மகனாக ஜூலை 4 - ம் நாள் 1975  வருடம் பிறந்தார்.
 இவருடைய சகோதரர் பெயர் பிரபு. படித்தது B.B.A . இவரடைய மனைவியின் 
பெயர் துர்கா கோபிநாத். இவருடைய குழந்தையின் பெயர் வெண்பா.

குடும்பத்துடன் 

கோபிநாத் சிறந்த நிகழ்ச்சி தொகுப்பாளர் என்பதயும் தாண்டி சிறந்த பேச்சாளர்,
சிறந்த சிந்தனையாளர், பத்திரிக்கையாளர் , எழுத்தாளர் என பல முகங்களில் 
தமிழர்களையும் தாண்டி உலக மக்களின் மனதில் நிற்கும் நல்ல முற்போக்கு
சிந்தனை உள்ளம் கொண்டவர். இதற்க்கு எல்லாம் சான்றாக விஜய் டிவியின்
நீயா நானாவில் அவரின் ஆளுமை திறனையும் , பேச்சு திறனையும் , ஒரு
முற்போக்கு சிந்தனைகளையும் காணலாம்.

நீயா நானா கோபிநாத் 

கோபிநாத் சிறந்த எழுத்தாளராகவும் வெற்றி பெற்றுள்ளார் என்பது இன்னுமொரு சாதனை. அதற்க்கு சான்றாக எளிமையான உரைநடையில் அவர் எழுதிய புத்தகங்களே சாட்சி.
 1 . தெருவெல்லாம் தேவதைகள் 
 2 . ப்ளீஸ் இந்த புத்தகத்தை வாங்கதீங்க
 3 . நேர் நேர் தேமா

எழுத்தாளர் கோபி

இதையும் தாண்டி சமூகத்திற்க்கான குறிப்பாக இளைஞர்களுக்கான இவரின்
வேண்டுகோள்கள், சிந்தனைகள் மிகவும் முக்கியமானவை. 5 நிமிடம்
பேசினாலே எவரையும் ரசிக்க வைக்கவும், தான் சொல்ல வந்த விசயத்தை
 நெற்றி பொட்டில் அடித்தாற்போல் சொல்லும் துணிவும் கோபிநாத்துக்கு
அழகு சேர்ப்பவை. தமிழகத்தின் பல்வேறு கல்லூரி,பள்ளிகளில் மேடை ஏறி
அறிவு சார்ந்த கருத்தக்களை எடுத்து முன்வைப்பதில் தன்னுடைய பணியை சிறந்த முறையில் செய்து வருகிறார்.

தொலைக்காட்சியில் இவரை அடையாள படுத்திய நிகழ்சிகள் பல இருந்தாலும் அவரின் நீயா நானா அவரின் பெயருடன் இணைந்து விட்டது.
அவரின் பங்களிப்புகள் சில,

 1 . மக்கள் யார் பக்கம் 
 2 . சிகரம் தொட்ட மனிதர்கள் 
 3 . நடந்தது என்ன ... என நீண்டு கொண்டே போகிறது கோபியின் பங்களிப்பு.

 அது சரி.. இவ்வளவு பணிகளுக்கும் சிறப்பு சேர்க்கும் வகையில் பல்வேறான விருதுகளை வழங்கி சிறப்பித்து இருக்கிறார்கள்.

* American Government Invitation to participate in International Visitors Programme (2004)

* Young International award by "India Today" Magazine (2007)

* Best Anchor of the State by "Anandha Vikatan" (2007,2008)

* Invited for the International Health Conference, Sydney (2007)

* Outstanding Young Indian by Junior Chamber International(JCI)(2008)

இன்னும் மேன்மை பெற வாழ்த்துக்கள் கோபி சார்...



அடுத்த அதிசயத்தில் சந்திப்போம் ....
 

    

பேரையூர் அதிசயங்கள்

நமது மக்களின் தொன்மையையும், பழமையையும் உலகிற்கு
எடுத்துக்காட்டும் புதுக்கோட்டையின் அதிசயங்களில் இந்த பதிவில் இடம்பெற்றுள்ளது பேரையூர்  பற்றிய ஒரு பதிவு .

கோயிலின் கோபுரம்

பெயர்காரணம்: 

பேரையூர் , புதுக்கோட்டைலிருந்து 15 கிலோமீட்டர் தொலைவில் பொன்னமராவதி செல்லும் வழியில் உள்ள அழகான அதிசயங்கள்
 நிறைந்த ஊர்.  பங்குனி மாதம் மீன லக்னத்தில் இங்கு அமைந்துள்ள சுனையிலிருந்து பேர நாதம் (மிருதங்க முழக்கம்) எழுவதால் பேரேஸ்வரம் என்று வழங்கப்படுகிறது. இதுவே பேரையூர் என்று மருவியுள்ளது.

இங்கு அமைந்துள்ள நாகநாதர் கோவில் புகழ் பெற்று விளங்கும் தளம்.
இந்த தளமானது அதிசயங்கள் நிறைந்தும், அதிக சக்தி வாய்ந்த தளமாகவும்
மக்களடத்தில் கருத்து நிலவி வருகிறது.  அதை மெய்பிக்கும் வகையில்
 கோயிலை சுற்றிலும் ஆச்சர்ய பட வைக்கும் ஆயிரகணக்கான நகத்தின்
சிலைகள் வைக்கப்பட்டுள்ளன. அனைத்தும் நினைத்தது நடந்தது என
மக்களால் நேத்திகடன் திருப்பி செலுத்தப்பட்ட நாகத்தின் சிலைகள்.

குளத்தை சுற்றிலும் நாகத்தின் சிலைகள்

 இனி இதன் வரலாற்றை பார்ப்போம்...

நாகராஜன் வணங்கிய தலம். எனவே இறைவன் நாகநாதர் எனப்படுகிறார்.

நகநாதருக்கு பால் அபிஷேகம்

நாகநாதருக்கு பால் அபிஷேகம் செய்வார்கள். பால் அவரது உடலில் பட்டவுடன் நீல நிறமாக மாறும் அதிசயத்தைக் காணலாம். இத்திருத்தலத்தின் பெருமை கிருதயுகத்திலே நான்¬முகனாகிய பிரம்மன் புண்ணிய நதிகளைக் கோயில் திருக்குளத்தில் சேர்த்து நீராடி பிறை சூடிய பெருமானைத் தரிசித்து துதித்த தலம்.

சர்ப்பத்தினால் தான் இழந்த ஒளியை மீண்டும் பெறுவதற்கு சூரியபகவான் இங்கு வழிபட்டார். இந்திரன் சாபவிமோசனம் பெற்ற அருள்தலம். வருணனின் மகன் தவமியற்றி கலி நீங்கிய பெரும்தலம். நாகராஜன் பணிந்தேத்தும் திருத்தலம். பஞ்சமாபாதகம் செய்த ஒருவன் இறைவனின் பூஜைக்குச் சாம்பிராணி தந்ததால் அவனது எமவாதை குறைந்தது.

இசை ஒலிக்கும் குளம்

கம்பீரமான பெரிய மதிற்சுவர்கள். அதன்மீது வரிசையாகக் கல்நாகர்கள் வைக்கப்பட்டுள்ளன. கோயில் எதிரே அமைந்துள்ளது திருக்குளம். உள்ளே பெரிய மண்டபம் காணப்படுகிறது. கிழக்கிலும், மேற்கிலும் இருவாசல்கள் உள்ளன. இரு வாசல்களிலும் கோபுரங்கள் காணப்படுகின்றன.


குளத்திலிருந்து இசை கேட்கும் அதிசயம்: 

பெரிய மண்டபத்தைக் கடந்து சென்றால் துவாரபாலகர்கள் காணப்படுகிறார்கள். உள்ளே கொடிரம், பலிபீடம், நந்திவிக்ரகம் ஆகியவை காணப்படுகின்றன. அங்கே சென்றால் ¬முதலில் காணப்படுவது "ஓம்' என்னும் வடிவில் அமைந்துள்ள புஷ்கரணி. இந்த புஷ்கரணி புண்ணிய புஷ்கரணியாகும். இது ஒரு சுனைநீர் ஆகும். இதிலிருந்து சுவாமிக்கு அபிஷேகத்திற்கு தீர்த்தம் எடுக்கப்படுகிறது. இச்சுனையில் நீர்மட்டம் குறையும்பொழுது பக்கச்சுவரில் திரிசூலக்குறியொன்று காணப்படுகிறது. சூலத்திற்கு சரிமட்டத்தில் நீர் அமைந்திருக்கும் வேளையில் பங்குனி மாதம் மீன லக்னத்தில் சப்தம் எழுகிறது. மற்ற நேரங்களில் நீர்மட்டம் சூலத்திற்கு சரிமட்டமாக இருந்தாலும் அந்த ¬முழக்கம் கேட்பதில்லை.
(நன்றி : ஹோலிஇண்டியா)

நாகபிரதிஷ்டை

இங்கு வந்து பிரதிஷ்டை செய்தால்(ஓமம் வளர்த்து பூஜை செய்தல்)
ஆறு வகையான தோஷங்கள் நீங்குவதாக மக்களால் நம்பபடுகிறது.
 1 . நாகதோஷம்
 2 . கலஷர்பதோஷம்
 3 . மாங்கல்யதோஷம்
 4 . புத்திரதோஷம்
 5 . சர்ப்பதோஷம்
 6 . ராகு கேது தோஷம்.

மேலும் சங்கு அபிஷேகமும் சிறப்பான பூஜையாக இங்கே நடத்தபடுகிறது.
இங்குள்ள நம்பிக்கைகளையும் தாண்டி அங்குள்ள நாக சிலைகளை
பார்த்தாலே பிரமித்து நிற்பது நிஜம்.
  
பேரையூர் நாகநாத சாமி கோயிலை சுற்றுலா மையமாக்க வேண்டும் கிராமசபை கூட்டத்தில் வலியுறுத்தப்பட்டுள்ளது .


மேலும் பல தகவல்களுக்கு:
www.peraiyurtemple.yolasite.com

அடுத்த அதிசயத்தில் சந்திப்போம்...

நேர்மையின் அவதாரம் - கலெக்டர் சகாயம் அதிசயங்கள்

 “லஞ்சம் தவிர்த்து, நெஞ்சம் நிமிர்த்து!’

இணையத்தில் சென்று சகாயம் என்று சொடுக்கினாலே அவரின் புகழ் பாடுகின்றன அனைத்து தளங்களும் வலைப்பூக்களும். அவரின் சாதனைகளையும் அவர் சந்தித்த சோதனைகளையும் நான் இணையத்தில் படித்த செய்திகள் மூலம் இங்கே பகிர்கிறேன்.

கலெக்டர் சகாயம் - என்று சொன்னாலே மதுரையில் பரபரப்பு பற்றி கொள்கிறது. (பேரை கேட்டாலே சும்மா அதிருதுல்ல).  நாமக்கல் முழுவதும் அவரின் புகழ் பாடியே மகிழ்கிறது.  நாமும் ஒருபுறம் சட்டை காலரை தூக்கி விட்டு கொள்ளலாம்.( அட நம்ம ஊருகாரருப்பா).

 புதுக்கோட்டை மாவட்டம் பெருஞ்சுணை கிராமத்தை சேர்ந்த, உபகாரம் பிள்ளை  என்பவருக்கு, ஐந்து மகன்கள். இதில் கடைக்குட்டியாய் பிறந்தவர் சகாயம். பெருஞ்சுணையில் பள்ளிப்படிப்பு, புதுக்கோட்டையில் பட்டப்படிப்பு, சென்னையில் முதுநிலை பட்டப்படிப்பு, சட்டப்படிப்பு என, அடுத்தடுத்து தன் கல்வி தகுதியை சகாயம் உயர்த்திக் கொண்டார். கலெக்டர் ஆகும் லட்சியத்துடன் யு.பி.எஸ்.சி  தேர்வு எழுத கனவு கைகூடாத நிலையில், தான் ஏற்கனவே எழுதி இருந்த டி.என்.பி.எஸ்.சி. , குரூப்-1  தேர்வில் தேர்ச்சி பெற்று துணை கலெக்டர் ஆனார் சகாயம்.

    அன்றைய நாளிலிருந்து அவர் கடந்து வந்த பாதை மிகவும் பெரியது.  தன்னுடைய நேர்மையின் பலனாய் அவர் பெற்றது இடம்  பதவி மாற்றங்களும்தான்.  இவர் நேர்மையாய் இருந்த காரணத்தால் அவர்

பெற்ற எதிர்ப்புகளை அவரின் பணிபுரிந்த இடங்களின் பட்டியலில் இருந்து அறியலாம்.

தர்மபுரியில் பயிற்சி கலெக்டர்

நீலகிரி மாவட்டம், கூடலூரில், ஆர்.டி.ஓ.,

திருச்சி கலெக்டரின் நேர்முக உதவியாளர் (பொது),

 கள்ளக்குறிச்சி சர்க்கரை ஆலை சிறப்பு அதிகாரி,

 காஞ்சிபுரம் ஆர்.டி.ஓ.,

 திருச்சி சிவில் சப்ளைஸ் முதுநிலை மண்டல மேலாளர்,

 கோவை கலால் பிரிவு துணை கமிஷனர்,

 சென்னை, டி.ஆர்.ஓ.,

 தொழில் வணிகத்துறை இணை இயக்குனர்,

 மாநில தேர்தல் ஆணைய செயலர்,

 நுகர்பொருள் வழங்கல் துறை இணை ஆணையர்,

 நாமக்கல் மாவட்ட கலெக்டர்,

 புது திருப்பூர் மேம்பாட்டு கழக நிர்வாக இயக்குனர்,

 மதுரை கலெக்டர்.

கடந்த 18 ஆண்டுகளுக்கு முன்பு தமிழ்நாடு அரசுப் பணியில் சேர்ந்த சகாயத்திற்கு , கடந்த 2001 -ம் ஆண்டு ஐஏஎஸ் அந்தஸ்து தேடி வந்தது.

அவரின் உரையிலிருந்து:

*ஒவ்வொரு அரசுப் பணியாளரும் தங்களது சொத்துக்களை அரசுக்கு தெரிவிக்க வேண்டும் என்பது பொதுவான விதி. நான் அதையும் தாண்டி, எனது சொத்து விவரத்தை மக்களுக்கும் சேர்த்து தெரியப்படுத்தி உள்ளேன்.

*எனக்கு கிடைத்த இந்த வாய்ப்பை ஏழை, எளிய மக்கள் முன்னேற்றத்திற்காக பயன்படுத்துவேன். அதுவே எனது லட்சியம் .

*நாட்டின் வளர்ச்சிக்கு ஊழல்தான மிகப் பெரும் தடைக்கல்.   நான் ஊழல் கரையோடு இருக்க மாட்டேன் என்பதை வெளி்ப்படுத்தும் வகையில்தான் இந்த சொத்துக் கணக்கு விவர வெளியீட்டுள்ளேன். நான் ஒரு முன்மாதிரியாக இருக்க விரும்புகிறேன்.. ( நன்றி பட்டாபட்டி வலைப்பூ)

நேர்மை மனிதர் சகயத்தின் சாதனைகள்:

 *அ.தி.மு.க., ஆட்சி காலத்தில், நீலகிரி மாவட்டம், கூடலூரில் ஆர்.டி.ஓ.,வாக இருந்த போது, நேர்மையான நடவடிக்கைகளால், அப்பகுதி மக்களின், “தோழனாக’ மாறினார் சகாயம். அப்போது மாவட்ட கலெக்டராக இருந்த லீனாநாயருக்கு, சகாயத்தின் செல்வாக்கு சங்கடத்தை கொடுக்க, அதிரடியாக அங்கிருந்து மாற்றம் செய்யப்பட்டார்.

*காஞ்சிபுரம் ஆர்.டி.ஓ.,வாக இருந்தபோது, மாசடைந்த குளிர்பானத்தை விற்பனை செய்தது தொடர்பாக வந்த புகாரையடுத்து, “பெப்சி’ குளிர்பான உற்பத்தி ஆலைக்கு, “சீல்’ வைத்து பரபரப்பு ஏற்படுத்தினார். பாலாற்றில் மணல் திருட்டை தடுக்க எடுத்த கடுமையான நடவடிக்கையால், கொலை முயற்சி தாக்குதலில் இருந்து தப்பினார்.

*கோவை மாவட்டத்தில் கலால் துறை துணை ஆணையராக இருந்த போது, மதுபானக் கடை ஏலத்தை அரசு விதிமுறைப்படி நடத்த வேண்டும் என்பதில் உறுதியாய் இருந்தார். அரசியல்வாதிகள், பினாமிகள் பெயரில் ஏராளமான கடைகளை எடுப்பதையும், “சிண்டிகேட்’ முறையில் நடந்த முறைகேடுகளுக்கு, “செக்’ வைத்தார்.

*அ.தி.மு.க., ஆட்சி நடந்த போது, திருப்பூர் அ.தி.மு.க., பிரமுகர் ஒருவருக்கு சொந்தமான பிராந்தி கடைகளில் அதிரடி சோதனைகளை நடத்தி பரபரப்பு ஏற்படுத்தினார். கோவையில் பிரபலமான சைவ ஓட்டலில், அனுமதி பெறாமல் மது வகைகள் பதுக்கி விற்கப்படுவதை அறிந்து, நேரடியாக, “ரெய்டு’ நடத்தி பரபரப்பை ஏற்படுத்தினார்.

*சென்னை டி.ஆர்.ஓ.,வாக இருந்தபோது, பிரபல ஓட்டல் நிறுவனம் ஆக்கிரமித்திருந்த, 48 கோடி ரூபாய் மதிப்புள்ள நிலத்தை அதிரடியாக மீட்டார். இதேபோல், 500 கோடி ரூபாய் மதிப்புள்ள பல்வேறு ஆக்கிரமிப்புகள், சகாயத்தால் அரசின் வசமானது. சுனாமி நிவாரண பணிகளில் நடந்த முறைகேடுகளை களைந்து, உண்மையிலேயே பாதிக்கப்பட்டவர்கள் பலன் பெற உதவினார்.

*தி.மு.க., ஆட்சியின் போது, முதல்வருக்கு இவர் எழுதிய கடிதம், அதிகாரிகள் மட்டத்தில் பெரும் பரபரப்பை ஏற்படுத்தியது. “நேர்மையான அதிகாரிகள் புறக்கணிக்கப்படுகின்றனர்’ என்பதோடு, தன் சொத்து விவரம், வங்கிக் கணக்கு உள்ளிட்டவற்றை கடிதத்தில் குறிப்பிட்டு, “இது தவிர எனக்கு ஏதாவது சொத்து இருந்தால், நடவடிக்கை எடுங்கள்’ என்று பகிரங்கமாக சவால் விடுத்தார். அதோடு, “நியாயம் கேட்டு, குடும்பத்தோடு உண்ணாவிரதம் இருப்பேன்’ என்ற போர் குரலை தொடர்ந்தே, சகாயத்திற்கு ஐ.ஏ.எஸ்., தகுதி உயர்வு கிடைத்தது என்கிறது நேர்மையான அதிகாரிகள் வட்டாரம்.

*நாமக்கல் மாவட்ட கலெக்டராக சகாயம் பணியாற்றிய இரண்டரை ஆண்டுகள், அந்த மாவட்ட மக்களுக்கு பொற்காலமாக இருந்தது. அந்த காலகட்டத்தில் தன் சொத்து கணக்கை வெளியிட்டு, ஐ.ஏ.எஸ்., அதிகாரிகள் மட்டத்தில் பொறாமைக்குள்ளானார்; பொதுமக்கள் மத்தியில் பெருமைக்குள்ளானார்.

*இவரது நேர்மைக்கு தேர்தல் கமிஷன் கொடுத்த அங்கீகாரம், தற்போதைய மதுரை கலெக்டர் பதவி. இவரது இருக்கைக்கு பின்புறம் இருக்கும் வாசகங்கள், “லஞ்சம் தவிர்த்து, நெஞ்சம் நிமிர்த்து!’

(நன்றி கல்விசோலை வலைப்பூ)

 ஆனந்த விகடனில் சகாயத்தின் பேட்டி:

புதுக்கோட்டை மாவட்டம் பெருஞ்சுனை குக்கிராமம்தான் என் ஊரு. 'மத்தவங்க தோட்டத்து மாங்காய் தெருவுல கிடந்தாக்கூட எடுத்துட்டு வரக் கூடாது'ன்னு சொல்ற அம்மா. 'நீ படிச்சு கலெக்டர் ஆகி, உதவின்னு கேட்டு வர்றவங்களுக்கு எல்லாம் உதவணும்டா'ன்னு சொல்லிட்டே இருக்குற அப்பா. 'கலெக்டர்தானே... ஆயிடுவோம்'னு படிச்சேன், ஆயிட்டேன்.  வேலைக்குச் சேர்ந்த முதல் நாள் நம்ம மனசு எந்தளவுக்குப் புத்துணர்ச்சியோடவும் புனிதமாகவும் இருக்கோ... கடைசி நாளின்போதும் அதே உணர்ச்சியோடு ஓய்வு பெறணும்னு மட்டும் முடிவு பண்ணேன்.

 "என்னை கோயம்புத்தூருக்கு டிரான்ஸ்ஃபர் பண்ணியிருந்த நேரம். என் பொண்ணு யாழினிக்கு அப்போ மூணு வயசு. திடீர்னு ஒருநாள் ராத்திரி அவ மூச்சுவிட சிரமப்பட்டா. ஹாஸ்பிடலுக்குத் தூக்கிட்டுப் போனா உடனே அட்மிட் பண்ணச் சொல்லிட் டாங்க. மாசக் கடைசிங்கிறதால கையில ஆயிரம் ரூபாய்கூட இல்லை. 

புது ஊரு. அறிமுகம் இல்லாத மனுசங்க. எனக்குக் கீழே வேலை

பார்க்குறவங்ககிட்ட கடன் கேட்கவும் சங்கடமா இருந்துச்சு. காஞ்சிபுரத்துல நான் வேலை பார்த்துட்டு இருந்தப்ப, எனக்கு நண்பரான ஒரு ஸ்கூல் டீச்சரும் அப்ப கோவைக்கு டிரான்ஸ்ஃபர் ஆகி வந்திருந்தாரு. அவர்கிட்ட தயங்கிட்டே நாலாயிரம் ரூபாய் கடன் கேட்கவும், அரை மணி நேரத்துல

கொண்டுவந்து கொடுத்தார்.உடனே, குழந்தைக்கு ட்ரீட்மென்ட் ஆரம்பிச்சுட்டோம். ஆனா, சம்பளம் வாங்கினதும் அந்தக் கடனை அடைச்சதும்தான் என் மனசுல இருந்த பாரம் இறங்குச்சு!''

''நான் அந்த கோயம்புத்தூர் சம்பவத்தை ஏன் சொல்றேன்னா... அப்ப என் கன்ட்ரோல்ல 650 மதுபானக் கடைகள் இருந்தன. லைசென்ஸ் புதுப்பிக்க கடைக்குத் தலா 10 ஆயிரம் ரூபாய்னு கொடுக்கத் தயரா இருந்தாங்க. நான் ஒரு வார்த்தை சொல்லியிருந்தா, அடுத்த அஞ்சாவது நிமிஷம் 65 லட்ச ரூபாய் என் வீடு தேடி வந்திருக்கும். ஆயிரம் ரூபாய்கூட கையில் இல்லாத, மகளுக்கு உடம்பு சரியில்லாத சூழ்நிலையில் மனநிலை என்ன மாதிரி இருக்கும்னு யோசிச்சுப்பாருங்க.

அதெல்லாம்தான் ஓர் அரசு அதிகாரியின் நேர்மைக்கான சோதனை. நேர்மையா இருக்குறதுல ஒரே ஒரு சிக்கல் மட்டும்தான். நாளுக்கு நாள் நமக்கு எதிரிகள் அதிகரிச்சுட்டே போவாங்க. அவங்களை மட்டும் சமாளிச்சுட்டாப் போதும்!'' - தடதடக்கும் வார்த்தைகளில் கொப்பளிக்கிறது உற்சாகம்.

காஞ்சிபுரத்துல டி.ஆர்.ஓ-வா இருந்தப்ப ஒரு பெரியவர் தான் வாங்கிய பெப்சியில் அழுக்குப் படலம் இருந்ததாகப் புகார் கொடுத்தார். சாம்பிளை லேப் டெஸ்ட்டுக்கு அனுப்பினதுல, 'மனிதர்கள் குடிக்க ஏற்ற பானமில்லை'ன்னு ரிப்போர்ட் வந்தது. சட்டப்படி அந்த நிறுவனம் மேல என்ன நடவடிக்கை எடுக்கணும்னு ஒரு அறிக்கை தயாரிச்சேன். ரொம்ப யோசனைக்குப் பிறகு தாசில்தார்கிட்ட எட்டு பூட்டு மட்டும் வாங்கிட்டு வரச் சொன்னேன். எதுக்குன்னு புரியாம வாங்கிட்டு வந்தவரைக் கூட்டிக்கிட்டு மதுராந்தகத்துல இருக்குற பெப்சி கம்பெனிக்குப் போனேன்.

நான் தயாரித்த அறிக்கையின் ஒரு நகலை கம்பெனி மேனேஜர்கிட்ட கொடுத்துட்டு, 'கம்பெனியைப் பூட்டி சீல்வைக்கப் போறோம். எல்லாரையும் வெளியே வரச் சொல்லுங்க'ன்னு சொன்னோம். அந்த மேனேஜரைவிட என்கூட வந்த தாசில்தார் ஆடிப் போயிட்டாரு. 'சார்... பெரிய பிரச்னை ஆயிடும். எதுக்கும் கலெக்டரை ஒரு வார்த்தை கேட்டுக்கலாம்'னு பதறுனாரு. 'கலெக்டரைக் கேட்டா சீல்வைக்க விட மாட்டாரு.

சட்டப்படி இந்தக் கம்பெனியை மூட நமக்கே அதிகாரம் இருக்கு. நீங்க தைரியமா உங்க கடமையைச் செய்யுங்க'ன்னு அவரை உள்ளே அனுப்பினேன். ஒரு மணி நேரம் கழிச்சு இன்னும் பதற்றத்தோடு வெளியே வந்தவரு, 'சார்... அவங்க அமெரிக்கா வரைக்கும் பேசுறாங்க சார்.

சி.எம்-கிட்ட பேசுறதாச் சொல்றாங்க சார். என்ன பண்ணலாம்?'னு கேட்டாரு. 'உள்ளே இருக்கிறவங்களை அரெஸ்ட் பண்ணிட்டு சீல்வைக்க வேண்டியதுதான்'னு நான் சொல்லவும்தான் எல்லாரும் பயந்து வெளியே வந்தாங்க. கம்பெனியை இழுத்து மூடி, எட்டு பூட்டுகளையும் போட்டு

சீல்வெச்சுட்டோம்.

நான் உடனே அலுவலகத்துக்குப் போகாம ஒரு குக்கிராமத்துக்குப் போயி ரேஷன் கடை, பள்ளிக்கூடத்தை எல்லாம் ஆய்வு பண்ணி முடிச்சுட்டு, ராத்திரி எட்டு மணிக்கு வீட்டுக்கு வந்தேன்.  மனைவி வாசல்லயே காத்துட்டு இருந்தாங்க. கலெக்டர், சீஃப் செக்ரெட்டரி, உள்துறைச் செயலாளர்னு பலரும் என்னைக் கேட்டு வீட்டுக்கு போன் பண்ணி இருக்காங்க. நான் திரும்ப எல்லோருக்கும் போன் பண்ணா, 'யாரைக் கேட்டு சீல்வெச்சீங்க? என்ன காரியம் பண்ணியிருக்கீங்க

தெரியுமா?'ன்னு எல்லாரும் கேள்வி கேட்டாங்க.

'நான் என் கடமையைத் தான் சார் செஞ்சேன். மக்களுக்கு நல்லது செஞ்சதுக்காக சஸ்பெண்ட் பண்ணா, தாராளமாப் பண்ணிக்கோங்க'ன்னு சொல்லிட்டேன்.  மறு நாள் எந்தப் பத்திரிகைலயும் பெட்டிச் செய்தியாக்கூட பெப்சிக்கு சீல்வெச்ச சம்பவம் ரிப்போர்ட் செய்யப்படவே இல்லை. ரெண்டு நாள் கழிச்சு ஜூனியர் விகடன்ல மட்டும் அந்தச் செய்தி விரிவா வந்திருந்தது. அதுக்குப் பிறகுதான் பெப்சிக்கு நான் சீல்வெச்ச விஷயமே வெளி உலகத்துக்குத் தெரிஞ்சது.

இதுவரை 15 இடங்களுக்கு என்னை மாத்தி மாத்திப் பந்தாடிட்டாங்க. இப்போதான் முதன்முதலா நாமக்கல் மாவட்டத்துக்கு கலெக்டர் ஆகியிருக்கேன். மாவட்டம் முழுக்க ஒரு கோடி மரக் கன்றுகள் நடத் திட்டமிட்டு, ஏழு லட்சம் மரக் கன்றுகளை நட்டாச்சு. அவற்றின் முறையான பராமரிப்புக்கும் ஏற்பாடு பண்ணியாச்சு.

இன்னும் 10 வருஷத்துல அதிக மரங்கள் உள்ள மாவட்டமாக நாமக்கல்

இருக்கும். ஏற்கெனவே நொந்து போயிருக்கும் விவசாயிகளை, 'குறை தீர்க்கும் கூட்டத்துக்கு வா'ன்னு ஒவ்வொரு மாசமும் கலெக்டர் ஆபீசுக்கு அலைக்கழிக்கிறது நல்லாவா இருக்குன்னு நானே விவசாயிகளைத் தேடிப் போக ஆரம்பிச்சேன். ஒருநாள் ராத்திரி முழுக்க அந்தந்த கிராமத்துலயே தங்கி, அவங்க குறைகளை வாழ்ந்து பார்த்துட்டு வருவேன். அப்பதான் அவங்க சொல்றதுக்கு முன்னாடியே அவங்க குறைகள் என்னன்னு நாமளே உணர முடியும்!'' என்கிற சகாயம், தன் மகள் யாழினியை மடியில் வைத்துக்கொண்டு, ''சொல்லுடா குட்டி... உயர உயரப் பற... 

வானம் வசப்படும்!'' என சொல்லிக் கொடுக்கிறார். ( நன்றி ஆ.வி)

நாமக்கலுக்கு பிறகு மதுரையை ஆட்டியவர்களை தேர்தல் சமயத்தில்

ஆட்டிய பெருமை நம்ம சகாயத்தை சேரும்.  தேர்தலுக்காக சிறப்பு கலெக்டராக பணியேற்ற சகாயம் இன்று வரை மதுரையை சுத்தபடுத்தி கொண்டிருக்கும் இரும்பு மனிதர் என்றே சொல்லலாம்.( எவ்வளவு

இடைஞ்சல் பண்ணுன்ங்க..).

அனைத்து கலெக்டர்களும் சொத்து மதிப்பை கட்ட தயங்கிய நேரத்தில்

தன்னுடுய சொதுமதிப்பை வெளியிட்டு தமிழகத்தில் தனது சொத்து விபரப் பட்டியலை வெளியிட்ட முதல் ஐ.ஏ.எஸ். அதிகாரி என்ற பெருமையை பெற்றார்.

சொத்து மதிப்பு: மதுரை மாவட்டம், மதுரை  தாலுகா ஆரப்பாளையம் கிராமத்தில் 9 லட்சம் ரூபாய் மதிப்புள்ள வீடு உள்ளது. பாரத ஸ்டேட் வங்கியில் ரூ. 7,172 உள்ளது. மேலும், எல்.ஐ.சியில் கடன் உள்ளது. அந்த கடனை செலுத்தி வருகிறேன் என்று குறிப்பிட்டுள்ளார் சகாயம்.

(நன்றி படுகை.காம் )

இன்று செய்தித்தாள்களை பார்க்கும் புதிது புதிதாய் எதாவது செய்து
மதுரையில் பரபரப்பாய் ஜொலித்துவரும் இந்த புதுகை நட்சத்திரம் எடுத்த
காரியத்தில் மேலும் மேலும் வெற்றி பெற வாழ்த்துக்கள்.

அடுத்த அதிசயத்தில் சந்திப்போம்....

நெடுங்குடி கிரிவலம் அதிசயங்கள்

திருவண்ணாமலையில் கிரிவலம் செல்வது போல, புதுக்கோட்டை மாவட்டம் நெடுங்குடி கைலாசநாதர் கோயிலிலும் பவுர்ணமிகளில் கிரிவலம் நடக்கிறது.

சென்னையில் உள்ளவர்களுக்கு மத்திய கைலாஷ் போன்று தென் பகுதில் உள்ளவர்களுக்கு தென் கைலாஷ்தான் நெடுங்குடி. இந்த கோவிலில் சிவராத்திரி அன்று மிக பெரிய அளவில் திருவிழாக்கள் நடத்தப்படும்.  சுத்துப்பட்டு கிராமத்தார்கள் அனைவரும் வந்து குவிந்து விடிய விடிய கொண்டாடிவிட்டு செல்வது வழக்கம்.

புதுக்கோட்டையில் இருந்து காரைக்குடி செல்லும் வழியில் கீழாநிலைக்கோட்டை பஸ் ஸ்டாப்பில் இறங்கி மேற்கே சுமார் 1 கி.மீ., தொலைவில் உள்ள கைலாசநாதர் கோயிலுக்கு செல்லலாம்.

இந்த தலதிற்குகான  வரலாறையும் பார்ப்போம்...

புராண காலத்தில் நெடுங்குடியில் வில்வமரங்கள் நிறைந்த மண்மலை குன்றுகள் இருந்தது. இங்கு வந்த பெருஞ்சீவி, சிரஞ்சீவி என்னும் சகோதரர்கள் சிவபெருமானை வழிபட எண்ணினர். அண்ணன் பெருஞ்சீவி தன் தம்பி சிரஞ்சீவியிடம் வழிபாட்டிற்காக காசியிலிருந்து புனித லிங்கம் எடுத்து வர கூறினார்.
அண்ணன் உத்தரவை ஏற்று தம்பி காசிக்கு சென்றார். ஆனால் பூஜைக்கு உரிய நேரத்தில் தம்பி வராததால், தானே சிவலிங்கம் ஒன்றை செய்து அண்ணன் சிவவழிபாடு செய்தார்.

காசிக்கு சென்ற தம்பி சிரஞ்சீவி தாமதமாக வந்து, தான் கொண்டுவந்த சிவலிங்கத்தை வைத்து மீண்டும் பூஜை செய்ய சொன்னார். அண்ணன் மறுக்கவே, ஆத்திரமடைந்த தம்பி கயிலைநாதனை நோக்கி தவமிருந்தார்.

கயிலைநாதன் இருவர் முன்பும் தோன்றி பெருஞ்சீவி பூஜை செய்த லிங்கம் கைலாசநாதர் எனவும், சிரஞ்சீவி கொண்டு வந்த லிங்கம் காசிநாதர் என பெயர் சூட்டி, இங்கு வழிபட்டால் காசியிலும், கையிலையிலும் வழிபட்ட பலன் கிடைக்க அருளினார்.

13ம் நூற்றாண்டில் பாண்டிய மன்னனால் இந்த ஆலயம் திருப்பணி செய்யப்பட்டது.

மனநிலை சரியில்லாதவர்களை குணமாக்கும் நம்பிக்கை :

மனநிலை பாதிக்கப்பட்டவர்கள் சன்னதி முன்பு மண்டபத்தின் உச்சியில் அமைக்கப்பட்ட 12 ராசி சக்கரத்தின் நேராக கீழே தரையில் பதிக்கப்பட்ட பத்மபீடத்தில் அமர்ந்து "ஓம் நமசிவாய' என்ற மந்திரத்தை 108 முறை ஜெபிக்க வேண்டும். இப்படி ஜெபிக்க மனநிலை சரியில்லாதவர்களை குணமாக்கும் என்று இப்பகுதி மக்களால் நம்பப்படுகிறது. அதை போலவே பிள்ளைப்பேறு இல்லாத தம்பதியர் இங்கு வந்து ஒரு நாள் தங்கியிருந்து சர்ப்பநதியில் நீராடி தேரோடும் வீதியில் 5 முறை வலம் வந்து பிரசன்ன நாயகிக்கும், கைலாசநாதருக்கும் அபிஷேக, அர்ச்சனைகள் செய்து வணங்கினால் மகப்பேறு உண்டாகும் என்று மக்களால் இன்றளவும் நம்பப்படுகிறது.

புதுக்கோட்டையில் உள்ள பெரும்பான்மையான கோவில்களை போலவே நெடுங்குடி கைலாசநாதர்-பிரசன்னநாயகி கோவிலும் மிக பழமையான கோவிலாகும். 13ம் நூற்றாண்டில் பாண்டிய மன்னனால் இந்த ஆலயம் திருப்பணி செய்யப்பட்டது.

திருவிழாக்கள்:

ஆடிபூரத்தன்று அம்பாளுக்கு திருவிழாவும், திருக்கல்யாணமும், கடைசித் திங்களில் ஐயப்பன் சன்னதியில் படிபூஜையும் நடக்கிறது. மாசி மாத மகா சிவராத்திரி விழாவில், தமிழகத்தின் பலபகுதியில் இருந்து 48 நாட்கள் விரதமிருந்து இந்த கோயிலுக்கு பாத யாத்திரையாக பக்தர்களும் வருகின்றனர்.

( தினமலர் கோவில்கள், ஹோலி இந்தியா மற்றும் முப்பழம் உதவியுடன்  படங்கள் மற்றும் செய்திகள்.. )

சின்ன சின்ன அதிசயங்கள்

நண்பர்களுக்கு வணக்கம் ,

             அலைபேசி மூலம் மிகவும் சிறப்பு பெற்று விளங்கும் குறுந்தகவல்களில் தற்பொழுது புதுகோட்டை பற்றிய ஆச்சர்யங்கள் என்ற தலைப்புடன் புதுக்கோட்டை பற்றிய ஆச்சர்யமான தகவல்களை சேகரித்துள்ளனர்.

               அநேகமாக அனவரும் படித்திருக்கலாம், படிக்காத சிலருக்காக ...

புதுக்கோட்டை பற்றிய ஆச்சர்யங்கள் :

1 ) தமிழ்நாட்டின் முதல் வடிவமைக்கப்பட்டு கட்டப்பட்ட நகரம்.

2 ) தமிழ்நாட்டின் மிகபெரிய மாவட்ட ஆட்சியாளர் அலுவலகம்.

3 ) தமிழ்நாட்டின் இரண்டாவது மிகப்பெரிய அருங்காட்சியகம் .

4 ) இந்தியாவின் முதன்மையான குடைவரை கோவில் கொண்ட நகரம் .

5 ) இந்தியாவின் இரண்டாவது பழமையான நுண்கலை ஓவியங்கள் 
     கொண்ட நகரம்.

6 ) இந்தியாவில் கடைசியாக சுதந்திரம் பெற்ற இராச்சியம்.

7 ) மூன்று மாநில நெடுஞ்சாலைகள் சந்திக்கும் ஒரே நகரம்.

8 )  2011-ல் தமிழ்நாட்டின் மிக வெப்பமான நகரம் (107.8 F)

மேலும் பல ஆச்சர்யங்களுடன் அடுத்த பதிப்பில் சந்திப்போம்....

திருவரங்குளம் அதிசயங்கள்

              புதுக்கோட்டை மாவட்ட அதிசயங்கள் என்றால் பெரும்பாலும் வரலாற்று சிறப்பு மிக்க ஒன்றாகத்தான் இருக்கும்.

            இந்த பதிவிலும் அதையே பின்தொடர்ந்து ஆலங்குடி
 அருகேயுள்ள திருவரங்குளம் என்ற கிராமத்தின் வரலாற்று
 பின்னணியையும் , அங்கு உள்ள அதிசயங்களையும் பதிய உள்ளேன்.

இதோ திருவரங்குளம் ஊரின் வரலாறும் , பெயர்காரணமும்.....

                                         

மண்ணுக்கு அடியில் 3000 பொற்பனம்பழம்:

           திருவரங்குளம் ஒரு காலத்தில் காடாக இருந்தது. அந்தக் காட்டில் வேடன் ஓருவன் தன் மனைவியுடன் வசித்து வந்தான். ஒருமுறை உணவு தேடச் சென்ற அந்த வேடுவச்சியைக் காணவில்லை. நீண்டதூரம் சென்றும் உணவு கிடைக்காத அவள், திரும்பி வரும் வழியை அறிய முடியாமல் தவித்தாள்.

        அவளை ஒரு முனிவர் கண்டார். பத்திரமாக அவளை வேடனிடம் ஒப்படைத்தார். அவர்களது வறுமை நிலையைக் கண்ட அவர் ஒரு பனைமரத்தை அவர்கள் அறியாமலே படைத்து விட்டு சென்று விட்டார்.

        அந்த மரத்திலிருந்து தினமும் ஒரு பொற்பனம்பழம் கீழே விழுந்தது. இதை எடுத்த வேடன், ஊருக்குள் வந்து ஒரு வணிகரிடம் கொடுப்பான். அதன் உண்மை மதிப்பை அறியாத அவனிடம், வணிகர் ஏதோ சிறிதளவு பொருளை மட்டும் கொடுப்பார். அதைக் கொண்டு உணவு சமைத்து அவன் காலத்தை ஓட்டி வந்தான்.

         இப்படியே 4420 பழங்களை விற்று விட்டான். வணிகரோ பெரும் பணக்காரராகி விட்டார். வணிகரின் அபரிமிதமான வளர்ச்சி கண்ட வேடனுக்கு சந்தேகம் ஏற்பட்டு சிலரிடம் விசாரிக்க, பல்லாயிரம் பணம் மதிப்புள்ள பொற்பனம்பழங்களை, வெறும் உணவுக்கு விற்றது கண்டு வருந்தினான். வணிகரிடம் தனக்குரிய பங்கைக் கேட்டான். அவர் மறுத்து விட்டார்.

       வேடன் மன்னரிடம் புகார் செய்தான். பொற்பனை பற்றி கேள்விப்பட்ட மன்னன் தன் ஏவலர்களை அனுப்பி அம்மரத்தை பார்த்து வர ஆணையிட்டான். அங்கோ மரமே இல்லை. அதற்கு பதிலாக ஒரு லிங்கம் காணப் பட்டது.

       இவ்விடத்தில் ஒரு கோயில் கட்ட தீர் மானித்தான். இதைக் கேள்விப் பட்ட வணிகரும், இறைவனால் இப்பொருள் வேடனுக்கு அருளப் பட்டது என்பதையறிந்து அவனிடமிருந்து பெற்ற பொற்பனம் பழங்களில் 1420 ஐ விற்று ஒரு கோயில் எழுப்பினார். மீதி 3000 பழங்களை கோயில் அறை ஒன்றில் பூட்டி வைத்தார்.

அப்பழங்கள் இவ்வூரிலேயே புதைந்து கிடக்கும் என இவ்வூர் மக்கள் இப்போதும் நம்புகின்றனர்.

                                                     

இக் கோயிலில் மூலவர் அரங்குளநாதர் எனப்படுகிறார்.. மூலவரின் பெயரை கொண்டு ஊரின் பெயர் வந்திருக்கலாம் என்பது எனது கருத்து.

                                                     

இவ்வூரைச் சேர்ந்த  பெண்மணியே தெய்வமான கதை :

        இவ்வூரைச் சேர்ந்த பெண்மணியான பெரியநாயகி என்பவர் இறைவன் மீது அதீத அன்பு பூண்டிருந்தார். ஒருமுறை தன் பெற்றோருடன் கோயிலுக்கு வந்தார். சற்றுநேரத்தில் மறைந்து விட்டார். பின்பு அசரீரி தோன்றி, அப்பெண்மணி சிவனுடன் ஐக்கியமாகி விட்ட தகவலை தெரிவித்தது.

       நகரத்தார் சமுதாயத்தினர் அவரை அம்மனாகக் கருதி, "பிரகதாம்பாள்' என பெயர் சூட்டி தனி சன்னதி எழுப்பினர். இது காலத்தால் பிற்பட்ட சன்னதி என்பது பார்த்தாலே புரியவரும்.

                                                     

சிறப்பு வாய்ந்த நடராஜர் சிலை :

           இக்கோயில் நடராஜர் சிலை சிறப்பு வாய்ந்த ஒன்று.  இதன் படிமம் டில்லியிலுள்ள தேசிய மியூசியத்தில் உள்ளது. சுவாமி அரங்குளநாதர் சுயம்புவாக அருள் தருகிறார். பாண்டியர் காலத்தில் கட்டப்பட்ட ராஜகோபுர தரிசனம் கோடி புண்ணியம் தரும்.

                                                

         இங்குள்ள திருச்சிற்றம்பலம் உடையாரை தரிசித்தால் காசி விஸ்வநாதரை தரிசித்த பலன் கிடைக்கும். 12 ராசிகளும் அதற்குரிய அதிதேவதைகளுடன் மூலிகை ஓவியமாக வசந்த மண்டபத்தின் உச்சியில் வரையப்பட்டுள்ளது.

பிரகாரத்திலுள்ள தெட்சிணாமூர்த்தியின் கையில் வீணை இருக்கிறது. பிரகாரத்தை நூற்றுக்கால் மண்டபம் என்கிறார்கள். ஒரு குதிரை வீரனின் சிற்பம் கல்பலகை ஒன்றில் வடிக்கப்பட்டுள்ளது.  இது இப்பகுதியில் வாழ்ந்த வீரனாக இருக்கலாம் என நம்பப்படுகிறது.

                                                     

     தியானம் செய்ய விரும்புவோர் இங்குள்ள அமைதியான சூழலை மிகவும் விரும்புவர். குரங்குகள் அதிகமாக உள்ளன. இவற்றின் சேஷ்டைகளை குழந்தைகள் ரசிப்பார்கள்.

இந்த திருத்தலமானது 500-1000 வருடங்களுக்கு முந்தையது  என்பது ஆச்சர்யம் தரும் செய்தியாகும் .

(from temple.dinamalar)

குடுமியான்மலை அதிசயங்கள்

குடுமியான்மலை - புதுக்கோட்டைக்கு பெருமை சேர்க்கும் மற்றும் ஒரு அதிசயம், சிற்ப கலையின் மணி மகுடம் என்றே சொல்லலாம்.

   குடுமியான்மலை புதுக்கோட்டையிலிருந்து 16 கி.மீ தொலைவில்
உள்ள ஒரு அழகான மற்றும் பல அதிசயங்களை கொண்ட கலை நயம் கொண்ட ஊர் என்றால் மிகை அல்ல.

                                           
இங்குள்ள கோயில் மூலவரின் பெயர் சிகாநாதசாமி. இந்த ஊருக்கான பெயர்காரணமும் இவரையே சார்ந்துள்ளது . அதற்க்கான வரலாறு
 இதோ உங்களுக்கு,
     " முன்னொரு காலத்தில் இக்கோயில் அர்ச்சகர் ஒருவர் பூஜைக்கு வைத்திருந்த பூவை எடுத்து அங்குவந்த தனது ஆசைநாயகிக்கு கொடுத்துவிட்டார்.
       அந்தச் சந்தர்ப்பத்தில் மன்னர் கோயிலுக்கு வந்துவிட, மன்னரைக் கண்டதும் செய்வதறியாது தவித்த அர்ச்சகர் தனது ஆசைநாயகியின் தலையிலிருந்த பூவை எடுத்து பூஜைக்குப் பயன்படுத்தி, அதைப் பிரசாதமாக மன்னருக்கு அளிக்க அதில் தலைமுடி ஒட்டியிருந்ததைக் கண்ட மன்னர் அதன் காரணத்தை அர்ச்சகரிடம் வினவினார்.
      அர்ச்சகர் சமயோதிதமாக கோயிலில் குடி கொண்டிருக்கும் மூலவருக்கு குடுமியுள்ளது என்று சொல்லிவிட்டார். வியப்பு மேலிட்ட மன்னர் இறைவனின் குடுமியைக் காட்டும்படி கேட்க, தனது பக்தனான அர்ச்சகரைக் காப்பாற்ற இறைவனும் லிங்கத்தில் குடுமியுடன் காட்சியளித்தார். "

         இதுதான் மூலவரின் பெயருக்கும் , ஊரின் பெயருக்கும் உள்ள பெயர்காரணம். சற்றே விளக்கமாக ,
            "கோயில் மூலவரின் பெயரான சிகாநாதசாமி என்பதைக் கொண்டு குடுமியான் மலை என்று அழைக்கப்படுகிறது."
               "சிகா என்பது குடுமி என்னும் பொருளில் குடுமியுள்ள இறைவன்
என்று வரும்"

                                                        
     மேலும் , இக்கோயிலில் குடுகொண்டுள்ள லிங்கத்திற்கு குடுமியிருப்பதைக் குறிக்கும் வண்ணம் லிங்கத்தின் குடுமி - முடிச்சு போன்ற பகுதி இருப்பதை பக்தர்களுக்கு காட்டப்படுகிறது.

அக்காலத்தில் திருநலக்குன்றம் என்னும் இவ்வூர் குன்றைச் சுற்றிலும் வீடுகள் அமைந்திருந்தன. குன்றின் மீது ஏறிச் செல்லும் போது ஒரு இயற்கைக் குகையினைக் காண்கிறோம். இது கற்கால மனிதர்களின் இருப்பிடமாக இருந்திருக்கலாம். குன்றின் உச்சியில் குன்றுதோரோடும் குமரன்கோயில் உள்ளது. குன்றின் கிழக்குச் சரிவில் சிகாநாதசாமி கோயில் உள்ளது.

 புதுக்கோட்டைப் பகுதியின் வரலாற்று நிகழ்ச்சிகள் குறித்த பல அறிய செய்திகளை குடுமியான்மலையிலுள்ள கல்வெட்டுகளின் மூலம் அறிந்து கொள்ள முடிகிறது. இங்குள்ள மேலக்கோயில் என்னும் குகைக்கோயிலும் அதன் அருகிலுள்ள கர்நாடக சங்கீதம் பற்றிய கல்வெட்டு ஒன்று உள்ளது.

                                                       

 பல்லவராயர்கள் இக்கோயிலின் பராமரிப்பிற்கு கொடைகள் அளித்த செய்தியை இங்குள்ள கல்வெட்டுகள் தெரிவிக்கின்றன. பல்லவராயர்களைத் தொடர்ந்து தொண்டைமான்களின் ஆட்சியில் இக்கோயில் சிறப்புடன் விளங்கியது. காலத்தால் முற்பட்ட தொண்டைமான் மன்னர்கள் இந்தக் கோயிலிலேயே முடிசூட்டிக் கொண்டார்கள். ரகுநாதராயத் தொண்டைமான்(1686 - 1730) குகைக் கோயிலின் முன் உள்ள மண்டபத்தைக் கட்டியிருக்கிறார். 1730ல் ராஜா விஜயரகுநாத ராயத் தொண்டைமான் இக்கோயிலிலேயே முடிசூட்டிக் கொண்டார். அம்மன் கோயிலிலுள்ள 1872ம் ஆண்டைச் சேர்ந்த கல்வெட்டொன்று ராமச்சந்திர தொண்டைமான் காலத்தில் இக்கோயிலின் திருக்குடமுழுக்குத் திருவிழா நடைபெற்ற செய்தியைத் தெரிவிக்கிறது

                                        
இம்மண்டபத்தின் முகப்புத் தூண்களில் அனுமன், வாலி, சுக்ரீவன் போன்ற சிற்பங்கள் உள்ளன.  மேலும், ஆனைவெட்டு மண்டபத்தில் மிகவும் கலைநயம் வாய்ந்த சிற்பங்களை காண முடியும்.
        "உயிரோட்டமுள்ள நரசிம்ம அவதாரக் காட்சியினை நரசிம்மரின் சிற்பத்தை ஒரு தூணில் காணலாம் "

                                     
       "உலகத்து அழகையெல்லாம் தன்வயப்படுத்திக் கொண்டு காட்சியளிக்கும் மோகினி(மோகினி உருவில் விஷ்ணு)"
      "வினை தீர்க்கும் விநாயகர்,பத்துத் தலையுடன் கூடிய இராவணன்,அகோர வீரபத்திரர் என பல சிற்பங்கள் நம்மை வியப்பில் ஆழ்த்துகின்றன"

                           
நாயக்கர் மண்டபத்தில் காணப்படும் வியாகரபாதர்(மனித உருவம் புலியின் கால்கள்) பதஞ்சலி(மனித உடலும் பாம்பு கால்கள் போன்றும்) சிற்பங்கள் காணத்தக்கவையாகும்.

                                        
ரகுநாதராயத் தொண்டைமான் குகைக்கோயிலுக்கு முன்னால் ஒரு மண்டபத்தைக் கட்ட உயரமான இந்த மண்டபத்திற்கு விஜரகுநாதராய தொண்டைமான் 1730 - 1769 படிக்கட்டுகள் அமைத்தார் என்றும் செய்திகள் அறியப்படுகிறது.

                   

            
     இவற்றை எல்லாம் மிஞ்சும் வகையில் அமைந்துள்ள ஆயிரங்கால் மண்டபம் அனைவரையும் வியப்பில் ஆழ்த்துகிறது.

அடுத்த அதிசயத்தில் மீண்டும் சந்திப்போம்...
( from Poetry in stone and kailaibala, mohandas blog)